Elman Hüseynovdan, Naxçıvan, Azərbaycan

Hörmətli cənab Prezident, Müzəffər Ali Baş Komandan!

Sizə olan sonsuz ehtiram və dərin minnətdarlığımı çatdırmağı özümə mənəvi borc bilirəm.

Azərbaycan dövlətçiliyinin salnaməsində mühüm və şərəfli səhifəsi olan Naxçıvan bu gün Sizin qətiyyətli iradəniz və uzaqgörən siyasətiniz sayəsində əsl inkişaf və tərəqqi dövrünü yaşayır. Ümummilli Lider Heydər Əliyevin Naxçıvanla bağlı qoyduğu müqəddəs siyasi irsin Sizin tərəfinizdən bu gün ən yüksək səviyyədə davam etdirilməsi, qədim diyarımıza göstərdiyiniz diqqət və qayğı hər bir naxçıvanlının, xüsusilə də biz gənclərin qəlbində böyük qürur hissi oyadır. Son illərdə Naxçıvanda həyata keçirilən genişmiqyaslı quruculuq işləri, sosial-iqtisadi inkişaf proqramlarının uğurlu icrası, müasir infrastrukturun yaradılması və əhalinin rifahının daha da yaxşılaşdırılması göz qabağındadır. Eyni zamanda, regionun təhlükəsizliyinin və müdafiə potensialının hər zaman diqqət mərkəzində saxlanılması bizə sabahımıza hər zamankından daha böyük əminliklə baxmağa imkan verir. Tarixi köklərimizə, mədəni irsimizə - Möminə Xatun türbəsinə və Memar Əcəmi irsinə göstərilən dövlət qayğısı isə keçmişimizə olan dərin ehtiramın və gələcəyə atılan inamlı addımın bariz nümunəsidir.

Biz gənclər yaxşı dərk edirik ki, müasir və qüdrətli Azərbaycanın quruculuğunda yaxından iştirak etmək, təhsilimizlə, intellektimizlə Vətənimizə layiqincə xidmət etmək bizim ən başlıca vəzifəmizdir. Sizin gənclərə hər sahədə yaratdığınız geniş imkanlar və göstərdiyiniz etimad bizim üçün ən böyük stimul, həm də gələcək uğurlarımızın əsas təməlidir.

Uca Tanrıdan Sizə möhkəm cansağlığı, yorulmaz dövləti fəaliyyətinizdə tükənməz enerji, Müzəffər Ordumuza və xalqımıza isə davamlı zəfərlər arzulayıram.

Dərin hörmət və səmimi ehtiramla,

Elman Hüseynov,

Naxçıvan Dövlət Universiteti tələbəsi

Azərbaycan Respublikası, Naxçıvan Muxtar Respublikası, Naxçıvan şəhəri