Prezident İlham Əliyev Sloveniyaya rəsmi səfəri çərçivəsində iyunun 9-da Lyublyana şəhər meriyasında olmuşdur.
Dövlət başçısını meriyanın qarşısında Lyublyananın meri Zoran Jankoviç qarşıladı.
Z. Jankoviç Prezident İlham Əliyevi salamlayaraq yeddi il əvvəl iş adamı qismində Bakıda olduğunu məmnunluqla xatırladı. O, Bakı ilə Lyublyana şəhərləri arasında əməkdaşlığın daha da inkişafı üçün çalışacağını bildirdi.
Azərbaycanı “Eurovision-2011” mahnı müsabiqəsində qazandığı qələbəyə görə təbrik edən Lyublyana şəhərinin meri gələn il Sloveniyanın bir çox incəsənət adamının Azərbaycana səfər edəcəyini qeyd etdi.
Dövlət başçısı Lyublyana şəhərinin inkişafı ilə bağlı görülən işləri yüksək qiymətləndirdiyini dedi.
Prezident İlham Əliyev son bir neçə il ərzində Lyublyananın daha da gözəlləşdiyini, abadlaşdığını və çox gözəl Avropa şəhərinə çevrildiyini vurğulayaraq dedi:
-Mən görürəm ki, həm şəhər rəhbərliyi, eyni zamanda, şəhər sakinləri öz şəhərlərinə çox böyük məhəbbətlə yanaşırlar və burada görülən abadlıq, gözəllik, bərpa işləri də böyük zövqlə aparılmışdır. Bütövlükdə Sloveniya-Azərbaycan əlaqələrinin inkişafı üçün bu gün çox əlamətdar bir gündür. Bu gün keçirdiyim görüşlər, apardığım danışıqlar və sabah keçiriləcək tədbirlər bizim ölkələrimizi bir-birinə daha da yaxın edəcəkdir. Bizim siyasi əlaqələrimiz çox yüksək səviyyədədir və bu əlaqələrimiz günü-gündən güclənir. Eyni zamanda, sabah keçiriləcək birgə biznes forum iqtisadi sahədə də əlaqələrin inkişafı üçün çox təsirli olacaqdır. Çünki qarşılıqlı maraq çox böyükdür və birgə iş görmək üçün bütün imkanlar vardır. Eyni zamanda, parlamentlərarası əlaqələr də yaxşı səviyyədədir və mən burada mənim köhnə dostumu görməkdən də çox məmnunam. Biz birlikdə Strasburqda işləmişik və çox yaxşı günlərimiz, yaxşı söhbətlərimiz olub. Azərbaycan indi 10 ildir ki, Avropa Şurasının üzvüdür. Amma bizim görüşlərimiz vaxtında biz təzə üzv olmuşduq və əlbəttə ki, bizim üçün hər şey orada təzə idi. Biz istəyirdik ki, tezliklə Avropa Şurasına inteqrasiya edək və öz yerimizi tutaq. Yadıma gəlir ki, siz də bizə çox köməklik göstərmişdiniz.
“Eurovision-2011” mahnı müsabiqəsində Azərbaycan gənclərinin qazandıqları qələbə münasibətilə təbrikinizə görə təşəkkür edirəm. Bir ildən sonra sloveniyalı qonaqları biz qəbul etməyə hazırıq, o cümlədən sizi, cənab mer. Amma ümid edirəm ki, siz o vaxtdan əvvəl Bakıya gələcəksiniz və biz əlaqələrimizi davam etdirəcəyik. Bir daha qonaqpərvərliyə görə təşəkkür edirəm.
Dövlət başçısı meriyanın xatirə kitabına ürək sözlərini yazdı.
