Prezident İlham Əliyev Bakı Ekspo Mərkəzində XXII Azərbaycan Beynəlxalq qida sənayesi və X Azərbaycan Beynəlxalq kənd təsərrüfatı sərgiləri ilə tanış olub.
Kənd təsərrüfatı naziri Heydər Əsədov dövlətimizin başçısına məlumat verdi ki, XXII Beynəlxalq qida sənayesi sərgisində 34 ölkədən 313 şirkət təmsil olunur. X dəfə keçirilən Azərbaycan Beynəlxalq kənd təsərrüfatı sərgisinə də dünyada maraq artmaqdadır. Sərgi iştirakçılarının 67 faizi xarici şirkətlərdir.
Prezident İlham Əliyevə məlumat verildi ki, Azərbaycanın “TUNA” şirkəti 1998-ci ildən fəaliyyət göstərir, yumşaq və sərt paketləmə ilə məşğuldur. Şirkətin üstünlüklərindən biri xammalın müəssisənin özündə istehsal olunmasıdır. Burada quraşdırılan avadanlıq hesabına təkrar istehsal da mövcuddur. Gələcəkdə şirkətin məhsullarının Rusiyaya və Qazaxıstana ixracı planlaşdırılır.
Azərsun Holdinqin stendi ilə tanışlıq zamanı dövlətimizin başçısına 1996-cı ildə çay fabrikinin açılışında iştirak edən ümummilli lider Heydər Əliyevin tapşırıq və tövsiyələrinə əsasən “Azərçay” markasının inkişafı və bu brendin dünyada təbliği ilə bağlı görülən işlər barədə məlumat verildi. Qeyd edildi ki, Masallı, Lənkəran və Astara rayonlarında yeni çay plantasiyaları salınıb, çayçılıq sahəsində məhsuldarlıq ildən-ilə daha da artır. Hazırda 50 ölkənin 100-dən çox hava limanında “Azərçay” markası ilə buraxılan məhsullar satılır. Bildirildi ki, bir qrup alim Azərbaycan çayının yeni fermentasiyası üsulunu ixtira edib.
Dövlətimizin başçısına məlumat verildi ki, Kənd Təsərrüfatı Nazirliyi sərginin iştirakçılarına “elektron kənd təsərrüfatı” xidmətlərindən istifadə qaydalarını da nümayiş etdirir. Kənd təsərrüfatı ilə məşğul olan şəxslər fermerlərin reyestrində qeydiyyatdan keçmək, kənd təsərrüfatı texnikasının, cins heyvanların, subsidiyaların alınması üçün onlayn xidmətlər, kənd təsərrüfatı texnikalarının qeydiyyatı, sürücülük vəsiqəsinin alınması və dəyişdirilməsi xidmətlərindən istifadə edə bilər.
Azərbaycanın “Buta Group” şirkəti aqrar sahədə iki şirkətlə təmsil olunur. Prezident İlham Əliyevə məlumat verildi ki, pomidor istehsalı ilə məşğul olan “AzTomato” şirkətinin illik ixrac gücü 1300 tondur. Gələcəkdə bu rəqəmin 3 min tona çatdırılması planlaşdırılır. “İsmayıllı Tərəvəzləri” şirkəti isə intensiv tərəvəzçiliklə məşğuldur. Burada müxtəlif çeşiddə kartof, soğan, kök, çuğundur, kələm istehsal edilir. Müəssisənin hazırda 5 min ton olan ixrac potensialının gələcəkdə 10 min tona çatdırılması planlaşdırılır. Hər iki şirkətdə istehsal olunan məhsullar ərəb ölkələri və Rusiya bazarlarına da çıxarılır.
Sərgidə ilk dəfə iştirak edən şirkətlər arasında “Agropromotion”da var. Belçika şirkəti olan “Agropromotion” Bolqarıstandan Azərbaycana süd məhsulları idxal edir. Şirkət qarşısına Azərbaycan bazarında layiqincə təmsil olunmağı məqsəd qoyub. Azərbaycana Bolqarıstandan idxal olunan pendir növləri yüksək keyfiyyətinə görə seçilir. “Agropromotion” Azərbaycandan başqa bir sıra ölkələrə də Bolqarıstanın süd məhsullarını idxal edir.
Türkiyənin “CANSA” şirkətinin stendi ilə tanışlıq zamanı Azərbaycan Prezidentinə məlumat verildi ki, bu müəssisə kənd təsərrüfatı avadanlıqlarının istehsalı ilə məşğuldur. 1983-cü ildə yaradılan şirkət “Keyfiyyətli məhsul və yüksək xidmət” devizini fəaliyyətində əsas istiqamət kimi götürüb. Sərgidə şirkətin istehsalı olan müxtəlif kənd təsərrüfatı avadanlıqları nümayiş etdirilir. Şirkətin məhsulları dünyanın əksər ölkələrinə ixrac edilir. “CANSA” şirkəti ilk dəfədir sərgiyə qatılıb.
Belarus da builki sərgidə bir neçə şirkətlə təmsil olunur. Onlardan biri Qrodnodakı “Neman” tütün fabrikidir. Bu şirkət 40-dan çox çeşiddə məhsulunu dünya bazarına çıxarır. Müəssisəsinin istehsal gücü illik 20 milyon siqaretə bərabərdir.
Sərgidə öz imkanlarını təqdim edən yerli şirkətlərdən biri də “Kaspi yıldız Azər-türk” müəssisəsidir. Prezident İlham Əliyevə müəssisə barədə məlumat verildi. Bildirildi ki, özəl sektorda 20 ildir uğurla təmsil olunan bu şirkət ölkə iqtisadiyyatının inkişafına töhfələr verib. 2012-ci ildə təsis edilən “Lerik broyler” müəssisəsi artıq ölkənin kənd təsərrüfatı sektorunda kifayət qədər tanınıb. Bu yaxınlarda isə şirkət ölkəmizdə kənd təsərrüfatı texnikasının və avadanlıqlarının istehsalına başlayıb. Sərgidə bu avadanlıqlar geniş şəkildə təqdim olunur.
“AZTEXNİKA” şirkəti sərgidə dördüncü dəfədir iştirak edir. Şirkət “John Deer” brendini Azərbaycana idxal edir. Ümumilikdə, bu brend altında istehsal edilən 20 adda kənd təsərrüfatı texnikası ölkəmizə gətirilir. 2007-ci ildən Azərbaycana idxal edilən bu brendin məhsulları keyfiyyəti və səmərəliliyi ilə seçilir.
Sərgidə iştirak edən müəssisələr arasında Azərbaycanın “Bee Hive” şirkəti də var. Şirkət tərəvəz və meyvə çiçəklərinin istixana və açıq bağlarda təbii tozlandırılması ilə məşğuldur. Dövlətimizin başçısına məlumat verildi ki, müəssisə İsrailin “Bio Bee” şirkətindən xüsusi cins ana arılar alır və onların yetişdirilməsini təmin edir. 2015-ci ildə yaradılan “Bee Hive” gələcəkdə fəaliyyətini genişləndirərək məhsullarını ixrac etməyi nəzərdə tutur.
Sərgidə bir sıra ölkələr milli stendlərini təqdim edirlər. Onlardan biri də İndoneziyadır. Bu ölkə Azərbaycanda müxtəlif sahələrə aid keçirilən sərgilərdə həmişə fəal iştirak edir. Stend İndoneziyanın Azərbaycandakı səfirliyinin dəstəyi ilə təşkil edilib. İndoneziyadan sərgidə, ümumilikdə, 8 şirkət iştirak edir. Onlar kənd təsərrüfatının müxtəlif sahələrini əhatə edir. İndoneziyanın milli stendində bu ölkənin mətbəxi də iştirakçılara geniş təqdim edilir. İndoneziya dünyanın əsas tropik kənd təsərrüfatı məhsulları istehsalçısıdır.
Azərbaycanda keçirilən bu sərgiyə böyük maraq göstərən ölkələrdən biri də Hollandiyadır. Bu ölkənin Bakı sərgisindəki milli stendində yeddi müxtəlif şirkət təmsil olunub. Prezident İlham Əliyevə məlumat verildi ki, bu şirkətlər istehsalda innovativ texnologiyalardan istifadə etməklə ənənəvi keyfiyyəti qoruyub saxlayır. Buna görə də onların məhsullarına beynəlxalq bazarlarda böyük tələbat var. Hollandiya stendi ilə tanışlıq zamanı dövlətimizin başçısına hədiyyə təqdim edildi.
Sərgidə Gürcüstanın milli stendi də məhsulun çeşidinin çoxluğu və müxtəlifliyi ilə diqqəti cəlb edir. Burada Gürcüstanda istehsal edilən müxtəlif kənd təsərrüfatı məhsulları nümayiş etdirilir. Onların arasında mineral sular, təbii şirələr, bal və digər məhsullar var. Kənd təsərrüfatı məhsulları üzrə ixtisaslaşan doqquz müxtəlif şirkətin sərgidə nümayiş etdirdiyi məhsullar təbiiliyi və keyfiyyəti ilə seçilir. Gürcüstan artıq Bakı sərgisində ikinci dəfədir ki, milli stendlə təmsil olunur. Stendlə tanışlıq zamanı Prezident İlham Əliyevə hədiyyə təqdim edildi.
“Maschio Gaspardo” şirkətinin məhsulları da sərgidə böyük maraqla qarşılanır. Dövlətimizin başçısının diqqətinə çatdırıldı ki, 1964-cü ildə yaradılan bu şirkət müxtəlif kənd təsərrüfatı avadanlıqlarının istehsalı ilə dünyada məşhurdur. Şirkətin kultivatorları, müxtəlif ölçülü dərmansəpənləri və kotanları yüksək keyfiyyəti ilə fərqlənir. İtaliyada yeddi, həmçinin Avropa, Asiya və ABŞ-da üç istehsal sahəsi və 13 filialı olan şirkət rəqabətədavamlı məhsulları ilə seçilir. Şirkətin məhsulları ətraf mühitin qorunması ilə bağlı nəzərdə tutulan bütün tələblərə cavab verir.
Uzun illərdir kənd təsərrüfatı texnikası istehsal edən “Rostselmash” şirkətinin məhsullarına dünyanın əksər ölkələrində tələbat var. On üç müəssisəni birləşdirən “Rostselmash” Rusiyanın ən iri kombayn istehsalçısıdır. Bu şirkətin məhsullarına ölkəmizdə böyük tələbat var. Hazırda bu istehsalçının məhsulu olan “Niva” kombaynı ölkəmizdə fəaliyyət göstərən fermerlərə təklif edilir. Şirkətin taxılyığan iri “TORUM” kombaynları da sərgidə nümayiş etdirilir.
Diqqətə çatdırıldı ki, Almaniyanın “Horsch” şirkəti sərgidə qarğıdalı, soya, günəbaxan toxumu səpən “Maestro” qoşqusunu təqdim edir. Bu kənd təsərrüfatı texnikası innovativ sistemi özündə birləşdirərək, əkin və toxumsəpmə proseslərində fermerlərə böyük səmərə əldə etməyə geniş imkanlar yaradır.
“Grow Group Azerbaijan” MMC Avropa texnologiyaları ilə təchiz olunan və ən son standartlara cavab verməklə yanaşı, tam avtomatlaşdırılan müasir plastik və şüşə istixana komplekslərinin satışı və quraşdırılması ilə məşğuldur. Dövlətimizin başçısının diqqətinə çatdırıldı ki, şirkət hollandiyalı tərəfdaşları ilə birgə şüşə örtüklü istixanaların da quraşdırılmasını həyata keçirir.
Amerikanın “John Deer” şirkəti dünyada ən etibarlı istehsalçılardan hesab edilir. Şirkətin fəaliyyətində innovasiyaların tətbiqinə və keyfiyyətə xüsusi diqqət yetirilir. Bu şirkətin məhsulları da sərgidə geniş nümayiş olunur.
Sonra Azərbaycan Prezidenti İlham Əliyev “Gəncə Avtomobil Zavodu” İstehsalat Birliyinin sərgidə nümayiş etdirilən traktorlarına baxdı. Burada müəssisənin istehsalı olan 10 müxtəlif model traktor, otbiçən və kotanlar nümayiş etdirilir. Traktor modellərindən bəziləri ilk dəfə olaraq müəssisə tərəfindən sərgidə təqdim edilir. Onların arasında pambıq əkini və kəskin isti hava şəraitində məhsul yığımı üçün nəzərdə tutulan kondisionerli traktorlar da var. Sərgidə nümayiş olunan traktorların 3-ü xüsusi təyinatlıdır. Onlardan tikinti, kommunal və yol təsərrüfatı sahələrində istifadə edilə bilər.
“Azərtexnika” MMC ölkəmizə Avropa və Türkiyədən kənd təsərrüfatı texnikasını idxal edir. Onların arasında Türkiyə istehsalı olan müxtəlif markalı traktorlar da var. Eyni zamanda, burada heyvandarlıq təsərrüfatlarına aid texnikalar da nümayiş olunur. Şirkətin sərgidə nümayiş etdirilən südsağan aqreqatları və südsoyudan çənləri, buğda, arpa, qarğıdalı, kartof və pambıq toxumu səpən avadanlığı, ağacları dərmanlayan qurğuları, kiçik və iri inkubatorları böyük maraqla qarşılanır.
Prezident İlham Əliyevə ölkəmizdə tərəvəz bitkiləri üzrə toxumçuluq layihəsi barədə də məlumat verildi. Bildirildi ki, layihənin əsas məqsədlərindən biri daxili bazarda güclü tələbat olan, o cümlədən ərzaq təhlükəsizliyi baxımından mühüm əhəmiyyət daşıyan tərəvəz bitkiləri üzrə yüksək məhsuldar toxumlar əldə etməkdir.
Sərgidə kənd təsərrüfatı sahəsində dünya liderlərindən olan Almaniyanın “Claas” brendinin məhsulları da nümayiş olunur. Bu brendin ölkəmizdəki rəsmi nümayəndəsi “Original Motors” şirkətidir. Sərgidə şirkətin nümayiş etdirilən taxıl və qarğıdalı yığan kombaynları, həmçinin traktorları yüksək keyfiyyəti ilə seçilir.
Prezident İlham Əliyev “Şəki-İpək” ASC və “İntertextil” şirkətinin stendlərinə də baxdı. Məlumat verildi ki, təbii ipəkdən müxtəlif məhsullar istehsal edən “Şəki-İpək” ASC fəaliyyətini ildən ilə genişləndirir və məhsulun çeşidini artırır. Şirkətin məhsulları arasında ipək parçalar, kəlağayılar, əllə toxunan Azərbaycan xalçaları diqqəti cəlb edir. “İntertextil” şirkətinin məhsulları da keyfiyyəti ilə seçilir. İllik istehsal gücü 4 min ton pambıq ipliyi olan müəssisə müxtəlif çeşiddə məhsullar buraxır. Burada, eyni zamanda, uniformalar və məktəbli geyimləri də istehsal edilir.
Şəki, Zaqatala və Qaxda istehsal sahələri fəaliyyət göstərən “İntertobacco” müəssisəsi 2006-cı ildə yaradılıb və indiyədək bir sıra iqtisadi uğurlara imza atıb. Şirkət məhsullarını xarici ölkələrə ixrac edir.
Oğuz qarğıdalı emalı məhsulları kompleksi ən müasir texnoloji avadanlıq və yeni istehsal sahələri ilə təchiz edilmiş müəssisədir. Burada istehsal edilən qlükoza, fruktoza, quru nişasta qida sənayesi sektorunda, kəpək, qarğıdalı qırıntısı heyvandarlıq, quşçuluq və balıqçılıqda istifadə edilir.
“CTS-Aqro” MMC-nin stendi ilə tanışlıq zamanı dövlətimizin başçısına məlumat verildi ki, 2004-cü ildən fəaliyyət göstərən bu qurum əsasən pambıq istehsalı, onun tədarükü və emalı ilə məşğuldur. MMC üzrə 2016-cı il mövsümündə respublikanın 16 rayonunda 18 min hektar, 2017-ci ildə 25 min hektar, 2018-ci ildə 30 min hektar, 2019-cu ildə 35 min hektar, 2020-ci ildə isə 50 min hektar sahədə pambıq əkini nəzərdə tutulur.
Kənd Təsərrüfatı Nazirliyinin dəstəyi, “Iteca Caspian” və “ITE Group” şirkətlərinin təşkilatçılığı ilə keçirilən bu sərgilər artıq yeni məhsul və texnologiyaların təqdimatı üçün nadir platformaya çevrilib.
