Təvəkkül Allahverdiyev və başqalarından, Quba, Azərbaycan

Möhtərəm Prezident,

7 fevral 2024-cii il tarixdə keçirilən növbədənkənar prezident seçkilərinin qalibi olmağınız münasibətilə Sizi təbrik edirik.

Ümummilli Lider Heydər Əliyevin möhkəm bünövrəsini qoyduğu çağdaş Azərbaycanın daha da qüdrətli olması naminə Sizin rəhbərliyinizlə həyata keçirilən irimiqyaslı layihələrin nailiyyətləri olaraq son 20 ildə ölkənin infrastrukturu yenidən qurulur.

Quba rayon Birinci Nügədi kəndinin Almaz Qazmaları yaşayış massivinin sakinlərinin üzləşdiyi problemin həlli ilə bağlı kənd sakinləri adından Sizə ünvanladığımız müraciət müsbət həllini tapmış, Sizin tapşırığınız əsasında yaşayış massivinin elektrik təchizatı yaxşılaşdırılmış, kənddə yeni müasir tipli transformator quraşdırılmışdır. Müraciətimizə həmişə olduğu kimi diqqət və qayğı ilə yanaşdığınız üçün Sizə Qarabağ müharibəsi veteranları, şəhid və əsgər ailələri, ahıllar, şagirdlər adından sonsuz təşəkkürümüzü bildiririk.

Möhtərəm Prezident,

Sizə çətin və şərəfli vəzifənizdə uğurlar, möhkəm cansağlığı, tükənməz enerji arzulayırıq.

Birinci Nügədi kəndi, Almaz Qazmaları yaşayış massivinin sakinləri adından hörmətlə,

Təvəkkül Allahverdiyev, Birinci Qarabağ müharibəsi veteranı,

B.Dostiyev,

İ.Allahverdiyeva,

N.Qurbanov,

M.Ağalarov və başqaları (15 nəfər).

Azərbaycan Respublikası, Quba rayonu, Birinci Nügədi kəndi.