Elxan Bayramovdan, Göygöl, Azərbaycan

Möhtərəm cənab Prezident, Müzəffər Ali Baş Komandan.

Sizin rəhbərliyinizlə 44 günlük Vətən müharibəsində ordumuz tarixi və şanlı qələbə qazanaraq xalqımıza böyük sevinc bəxş etdi, onun adını qalib xalqlar sırasına yazdı. Doğma Qarabağımız işğaldan azad olundu, ölkəmizin ərazi bütövlüyü bərpa edildi. Sizin Ali Baş Komandan kimi Vətən müharibəsində göstərdiyiniz şücaət, qətiyyət və sərkərdəlik məharətiniz harada yaşamasından asılı olmayaraq bütün azərbaycanlılara və türk dünyasına qurur hissi yaşatmış, hətta dünyanı heyrətə gətirmişdir. Siz təkcə Müzəffər Ali Baş Komandan kimi zəfər qazanmadınız, eyni zamanda, ata vəsiyyətini də yerinə yetirərək milyonların qəlbində əbədi taxt qurdunuz. Xalqımız əmindir ki, bundan sonra da, Siz Azərbaycanımızı ancaq zəfərlərə aparacaqsınız.

Biz - şəhid ailələri öz doğma yurdumuzdan məcburi köçkün düşmüşdük. “Dəmir yumruğ”un gücü ilə qazandığımız şanlı Zəfər sayəsində artıq biz məcburi köçkün deyilik, övladlarımızın da qisası alınıb. Buna görə Sizə çox minnətdarıq.

Sizin şəhid ailələrinin, müharibə veteranlarının daim xüsusi diqqət mərkəzində saxlamağınız, ən xırda problemlərimizə belə yüksək həssaslıqla yanaşmağınız nə qədər qayğıkeş dövlət başçısı olduğunuzu bir daha sübut edir. Bizim ən böyük arzularımızdan biri dədə-baba yurdlarımızı görmək, eləcə də orada uyuyan doğmalarımızın məzarlarını ziyarət etmək idi. Çox şükürlər olsun ki, qayğınız nəticəsində biz öz doğma Kəlbəcərimizə gedərək, orada olan müqəddəs məkanlarımızı, qəbiristanlıqlarımızı ziyarət etdik. Bu, şəhid ailələrinə olan sonsuz ehtiram və məhəbbətin bariz nümunəsidir.

Möhtərəm cənab Prezident, kəlbəcərlilər, o cümlədən kəlbəcərli şəhid ailələri hər zaman Sizin “dəmir yumruğ”unuz ətrafında sıx birləşib, Sizin daxili və xarici siyasətinizi dəstəkləyir, ölkəmizin, eləcə də Qarabağımızın çiçəklənməsi, Azərbaycanımızın qüdrətlənməsi naminə apardığınız işlərdə Sizin yanınızdadır.

Tanrı Sizi və ailənizi qorusun.

Hörmətlə,

Kəlbəcərli şəhid ailələri adından,

Bayramov Elxan Məhəmməd oğlu

Azərbaycan Respublikası, Göygöl rayonu, Bənövşəli kəndi.