Günay Hacıyevadan, Bakı, Azərbaycan

Hörmətli cənab Prezident.

Zəfərimizlə başa çatan Vətən müharibəsində qəhrəmancasına vuruşaraq şəhidlik zirvəsinə ucalan kapitan Həsənov Əsədin bacısı kimi, Sizi və hörmətli Mehriban xanımı, Vətən uğrunda şücaət göstərən şərəfli əsgərlərimizi, zabitlərimizi, ordumuzu və bütövlükdə xalqımızı torpaqlarımızın işğaldan azad olunması münasibətilə təbrik edirəm. Ulu Tanrıdan şəhidlərimizə bir daha rəhmət, yaralılarımıza şəfa arzu edirəm. Bu gün bütün şəhidlərin ruhları şaddır. Onların arzuları yerinə yetib.

Türkiyə Prezidenti Rəcəb Tayyib Ərdoğan tərəfindən Sizə Türk Dünyasının Ali Ordeninin təqdim olunması münasibətilə Sizi təbrik edirəm.

Sizin şəhid ailələrinə, qazilərə göstərdiyiniz diqqət və qayğınızın canlı şahidi olaraq, Sizə dərin təşəkkürümü bildirirəm. Sizin həyata keçirdiyiniz sosialyönümlü tədbirlər əsasında şəhid ailələrinin problemləri həll olunur. Himayəmdə iki azyaşlı övladım var. Mən işsiz idim və işlə bağlı müraciət etdim. DOST İş Mərkəzində işlə təmin edildim. Mərkəzin insan resursları şöbəsində aparıcı mütəxəssis vəzifəsinə təyin olundum. Burda mənə yüksək səviyyədə qayğı ilə yanaşırlar.

Şəhid ailələrinə göstərdiyiniz qayğınız və diqqətiniz üçün Sizə dərin minnətdarlığımı bildirirəm. Çox sağ olun, Müzəffər Ali Baş Komandanımız.

Hörmətlə,

Günay Hacıyeva

Şəhid bacısı

Azərbaycan Respublikası, Bakı şəhəri, Nərimanov rayonu.