İlqar Rəhimovdan, Bakı, Azərbaycan

Möhtərəm cənab Prezident.

Azərbaycan Milli Paralimpiya komandası “Tokio-2020” XVI Yay Paralimpiya Oyunlarında 14 qızıl, 1 gümüş, 4 bürünc olmaqla ümumilikdə 19 medal qazanaraq 163 ölkə arasında 10-cu yerdə qərarlaşmışdır. Paralimpiyaçılarımız əzmkar mübarizə apararaq 2 dünya və 2 paralimpiya rekorduna da imza atıblar. Belə yüksək nailiyyətlərin əldə edilməsi Sizin ölkəmizdə gənclərə, idmana və xüsusilə paralimpiya hərəkatına göstərdiyiniz diqqət və qayğının nəticəsidir.

Əziz Prezidentimiz, “Tokio-2020” XVI Yay Paralimpiya Oyunlarında yüksək nəticələr əldə etmiş idmançılar və onların məşqçilərini təltif etdiyinizə, maddi vəziyyətlərinin yaxşılaşdırılması üçün göstərmiş olduğunuz dəstəyə görə Sizə dərin minnətdarlığımızı bildiririk. Bu bizim üçün yüksək şərəf və eyni zamanda böyük məsuliyyətdir. Söz veririk ki, qarşıdan gələn mötəbər yarışlarda və “Paris-2024” XVII Yay Paralimpiya Oyunlarında idmançılarımız ölkəmizi layiqincə təmsil edəcək, Sizin rəhbərliyinizlə rəşadətli Azərbaycan Ordusunun misilsiz qəhrəmanlıq göstərərək Qarabağda qaldırdığı bayrağı daim zirvələrdə dalğalandıracaqlar.

Müzəffər Ali Baş Komandanın rəhbərliyi ilə yenilməz komanda olaraq hər zaman zəfərə doğru addımlayacağıq!

Dərin hörmətlə,

İlqar Rəhimov

Milli Paralimpiya Komitəsinin prezidenti

Azərbaycan Respublikası, Bakı şəhəri.