Əlixan Məhərrəmlidən, Kayseri, Türkiyə

Hörmətli Prezident, Müzəffər Ali Baş Komandan,

Mən Türkiyənin Kayseri şəhərində təhsil alan azərbaycanlı tələbələrin birliyinin və türk dünyasının 11 ölkə və topluluğundan olan tələbə təmsilçilərini birləşdirən Türk Dünyası Tələbələr Birliyinin sədriyəm.

Sizi müzəffər Azərbaycan Ordusunun Qələbəsi və Zəfər paradı münasibətilə təbrik edirəm. Biz gənclər bu qələbə dövründə xaricdəki bir diaspor qüvvəsi olaraq işlədik və xarici ölkə vətəndaşlarını bu müharibə barədə məlumatlandıran bir çox proqramlar, seminarlar və mətbuat konfransları təşkil etdik.

Sizin düşmənə qarşı dik duruşunuz gənclər olaraq bizə ilham və örnək olmuşdur. Sizin daxili və xarici siyasətiniz, göstərdiyiniz böyük səylər nəticəsində bu gün biz - Qarabağı görməyən gənclər başıuca Şuşaya, Ağdama, Laçına gedəcəyimiz günləri səbirsizliklə gözləyirik. Qazaxıstan, Qırğızıstan, Özbəkistan, Türkmənistan, Əfqanıstan və bir çox topluluqların Kayseridə təhsil alan tələbə təmsilçilərinin böyük qələbə münasibətilə Sizə olan təbrik və ehtiramlarını çatdırıram. Xalqımıza baş ucalığı gətirdiyiniz üçün Sizə təşəkkür edirik.

Sevgi və hörmətlə,

Məhərrəmli Əlixan Həsən oğlu,

Kayseri Azərbaycanlı Tələbələr Birliyi və Türk Dünyası Tələbələr Birliyinin sədri.

Türkiyə Respublikası, Kayseri şəhəri.