Valeh Bayramovdan, Göygöl, Azərbaycan

Müzəffər Ali Baş Komandan.

Sizi öz adımdan, ailəm adından Şuşamızın geri alınması və digər qələbələr münasibətilə təbrik edirəm. Şuşanın geri alınması ilə Qarabağımız düşməndən azad olundu və Siz qəti qələbə qazandınız. Siz Qarabağı qaytarmaqla Azərbaycanı özünə qaytardınız. Vətən müharibəsində Sizin rəhbərliyinizlə qazanılan qələbələr sayəsində yazılan ən yeni Azərbaycan tarixini oxumaq bizə - yaşlı nəslə də nəsib oldu.

Mənim 73 yaşım var. Əgər ömürdən pay olsaydı, ömrümün qalan hissəsini Sizə bağışlayardım. Türk dünyasının böyük sərkərdəsi kimi XXI əsrdə qazandığınız qələbələrə görə Sizə generalissimus ali hərbi rütbəsinin verilməsini arzulayıram. Sizin həmin ali rütbədə olan formadakı şəkliniz hər bir azərbaycanlı ailəsinin evinin divarında asılacaqdır.

Müzəffər Ali Baş Komandan, Allah Sizi və rəhbərlik etdiyiniz şanlı Ordumuzu, eləcə də bizə siyasi və mənəvi dəstək olan Türkiyəmizi və onun Prezidentini qorusun. Müstəqil Azərbaycan dövlətinin qurucusu və banisi ulu öndərimiz Heydər Əliyevə Allah rəhmət etsin. Şəhidlik zirvəsinə ucalmış Vətən övladlarına Allahdan rəhmət diləyir, yaralılarımızın tez sağalmasını arzulayıram.

Yaşasın Azərbaycan!

Qarabağ daim bizim olacaq! Qarabağ Azərbaycandır!

Hörmətlə,

Valeh Bayramov

Azərbaycan Respublikası, Göygöl rayonu.