İlham Əliyev Bakıda “JW Marriott Absheron” otelinin açılışında iştirak etmişdir

01 aprel 2012, 13:00

Prezident İlham Əliyev və xanımı Mehriban Əliyeva Bakıda “JW Marriott Absheron” otelinin açılışında iştirak etmişlər.

Dövlət başçısı otelin rəmzi açılışını bildirən lenti kəsdi.

Azərbaycan Prezidenti və xanımı oteldə yaradılmış şəraitlə tanış oldular.

Məlumat verildi ki, köhnə “Abşeron” mehmanxanasının yerində tikilən yeni “JW Marriott Absheron” oteli dünya şöhrətli “Marriott International” şirkətinin ölkəmizdəki ilk otelidir. Bakıda beynəlxalq səviyyəli bu cür otellərin tikilməsi ölkəmizdə turizmin inkişafının istər yerli, istərsə də xarici şirkətlər üçün yaradılan əlverişli investisiya mühitinin bariz göstəricisidir.

Qeyd edildi ki, oteldə otaqların layihələndirilməsi və tərtibatı zamanı Azərbaycanın təbiəti, memarlıq abidələri, eləcə də Xəzər dənizinin elementləri öz əksini tapmışdır. Oteldə yüksək kateqoriyalı “Executive studio”, “Executive Deluxe”, “Executive Premier” və “President luxe” də daxil olmaqla ümumilikdə 243 geniş otaq vardır.

Oteldə Şərq mətbəxinin təamlarının təklif edildiyi “Fireworks Oriental Kitchen”, İtaliya mətbəxinin nümunələri olan “OroNero Bar&Ristorante” restoranları, “Razzmatazz Cocktail&Lounge” barı və “Zest Lifestyle” kafesi vardır. Burada, həmçinin Azadlıq meydanı tərəfdən xüsusi girişi olan restoranlar, bar və kafe fəaliyyət göstərir.

Bildirildi ki, otelin binasının üst üç mərtəbəsini əhatə edən “Abşeron Spa” mərkəzində qonaqlar Bakının və Xəzər dənizinin füsunkar mənzərəsini seyr etmək imkanına malik olacaqlar. Mərkəzdə altı prosedur otağı, daxili hovuz, buxar otağı və sauna vardır.

Qeyd edildi ki, işgüzar görüşlər və konfransların keçirilməsi üçün oteldə təbii Günəş işığı ilə işıqlandırılan 13 iclas zalı vardır. Otelin mirvarisi hesab olunan 1208 kvadratmetrlik sütunsuz “Şərq” zalında böyük tədbirlərin, sərgilərin və digər mərasimlərin keçirilməsi üçün hər cür şərait yaradılmışdır.

Dövlət başçısı otelin terrasında da yaradılmış şəraitlə tanış oldu. Məlumat verildi ki, otelin həyətindən bulvara çıxan yeraltı keçid də tikilir.

“JW Marriott Absheron” oteli Azərbaycanın böyük turizm potensialına malik olmasını və tezliklə respublikamızın dünyanın elit turizm mərkəzlərindən birinə çevriləcəyini bir daha təsdiqləyir.

Prezident İlham ƏLİYEV otelin işçiləri ilə görüşdü, onları salamlayaraq dedi:

-Bu gün şəhərimizin tarixində çox əlamətdar bir gündür. Bakıda gözəl, möhtəşəm “Marriott” oteli açılır. Bu hadisə münasibətilə sizi ürəkdən təbrik edirəm. Bu, doğrudan da şəhərimizin inkişafı üçün çox vacib olan hadisədir.

Mən çox şadam ki, “Marriott” oteli bütün dünya standartlarına cavab verir. Ən gözəl şərait yaradılıbdır. Qonaqların istirahəti, müxtəlif tədbirlərin keçirilməsi üçün bütün şərait vardır. Otelin xarici görünüşü də, daxili dizaynı da çox gözəldir.

Burada bütün işlər böyük zövqlə görülübdür. Mən əminəm ki, bu otel nəinki Azərbaycanın, bütün bölgənin ən gözəl otellərindən birinə çevriləcəkdir. Şübhə etmirəm ki, burada xidmət də yüksək səviyyədə olacaqdır. Çünki “Marriott” dünya şöhrətli otellər şəbəkəsidir. “Marriott”un Azərbaycana gəlməsi, eyni zamanda, Azərbaycanda gedən inkişafın əlamətidir.

Eyni zamanda, qeyd etmək istəyirəm və çox şadam ki, otel öz tarixi “Abşeron” adını da saxlayıbdır. Çünki 1980-ci illərdə burada “Abşeron” otelinin tikilməsi o dövr üçün böyük hadisə idi. Bir tərəfdə “Abşeron”, digər tərəfdə “Azərbaycan” otellərinin tikilməsi bizim əsas meydanımızın hüdudlarını da müəyyən etmişdi. İndiki dövrdə artıq həyat yeni inkişaf dinamikası tələb edir. Mən çox şadam ki, Bakının bugünkü mənzərəsində yenə bizim əsas meydanımız olan Azadlıq meydanı iki gözəl otellə əhatə olunub və beləliklə, bu gözəl meydan tamamlanır.

Otelin tikintisi Azərbaycana investorlar tərəfindən göstərilən diqqətin də əlamətidir. Dünya şöhrətli otellər şəbəkələrinin Azərbaycana gəlməsi və fəaliyyətə başlaması Azərbaycanda gözəl investisiya iqliminin təzahürüdür. Biz bütün sahələrdə investisiyaları alqışlayırıq və çox şadam ki, hazırda turizm sektoruna, otelçilik sektoruna sərmayə qoyulur. Təkcə son bir il ərzində şəhərimizdə dörd beşulduzlu otel istifadəyə verilibdir. Bu, dördüncüsüdür və yaxın aylar ərzində Bakıda daha iki beşulduzlu otel açılacaqdır. Hesab edirəm ki, bu, bölgənin tarixində nadir bir hadisədir. Bir il, ilyarım ərzində bir şəhərdə beşulduzlu altı otel yaradılır və bu şəhərin adı Bakıdır. Bakı bu inkişafa layiqdir. Çünki Bakı dünyanın ən gözəl şəhərlərindən biridir. Bakının tarixi gözəlliyi vardır. Qədim Bakının gözəlliyi vardır və bu, bizim qürur mənbəyimizdir. Eyni zamanda, gəncləşən, müasirləşən Bakı da dünya miqyasında artıq özünə yer tuta bilibdir.

Otelin ətrafı da abadlaşdırılır. Qonaqlar burada tikilmiş yeraltı keçid vasitəsilə bulvara çıxacaqlar. Bakının tarixi bulvarı buradan, bu nöqtədən başlayır. Tarixi bulvarımızın uzunluğu 3,5 kilometr təşkil edir. Vaxtilə, Sovet İttifaqında məsafə baxımından ən böyük bulvar Bakı bulvarı idi. Ancaq müasir Bakının, müasir Azərbaycanın inkişafı tələb edirdi ki, biz bulvarın da uzunluğunu artıraq. Hazırda yeni bulvarın tikintisi, Bayraq Meydanında dənizkənarı zolaqların tikintisi nəticəsində ayyarım bundan sonra Bakı bulvarının - köhnə, yeni və Bayraq Meydanındakı bulvarın uzunluğu 14-15 kilometrə çatacaqdır.

Bu məqsədlə bulvar üçün yeni kiçik avtobuslar sifariş edilibdir. Bulvardan Bayraq Meydanına qədər dəniz taksiləri işləyəcəkdir. Yəni, doğrudan da şəhərdə elə nadir şərait yaradılır ki, bunun analoqunu tapmaq çox çətindir. Qısa müddət ərzində bu qədər inkişaf, bu qədər investisiyalar doğrudan da ölkəmizin yüksəliş dinamikasını göstərir.

Ölkəmizin bölgələri də inkişaf edir. Bölgələrdə də beşulduzlu otellər tikilir. Şahdağ Qış-Yay Xizək Mərkəzi bu ilin sonunda açılacaqdır. Bu da dünya miqyasında ən gözəl xizək kurortu olacaqdır. Hazırda orada da bir neçə beşulduzlu otel tikilir.

Gələcəkdə Azərbaycana turistlərin gəlişi nəticəsində ölkəmiz dünyanın turizm xəritəsində də öz yerini tapacaqdır. Bu gün bölgənin iqtisadi, siyasi mərkəzi Azərbaycandır. Bu gün qitənin enerji mərkəzi Azərbaycandır. Mən çox istəyirəm ki, Azərbaycan bölgənin və dünyanın turizm mərkəzlərindən birinə çevrilsin. Buna imkanlar vardır.

Bizim çox gözəl ölkəmiz, çox gözəl insanlarımız vardır. Azərbaycan vətəndaşları çox qonaqpərvərdirlər. Xarici qonaqlara həmişə böyük hörmət və diqqət vardır. Gözəl iqlimimiz vardır. Təhlükəsizlik şəraiti çox yaxşıdır. Gecə-gündüz insanlar təhlükəsiz şəraitdə gəzə, dincələ bilirlər. Gözəl coğrafi vəziyyətimiz vardır. Şəhərin infrastrukturu yeniləşir və artıq gözəl, möhtəşəm otellərimiz vardır. İstənilən beynəlxalq tədbiri Azərbaycanda keçirmək üçün çox gözəl şərait vardır.

Mən dünyanın müxtəlif yerlərində olmuşam. Müqayisə aparmaq üçün kifayət qədər imkanlarım vardır. Həmişə çalışmışam ki, biz dünyada ən gözəl təcrübəni Azərbaycanda tətbiq edək, əlbəttə ki, öz xüsusiyyətlərimizi nəzərə almaq şərti ilə. Deyə bilərəm ki, dünya miqyasında çox kiçik bir ərazidə bu qədər gözəl otellərin tikintisinə çox nadir hallarda rast gəlmək olar. Bakıda biz bunu görürük. Bakıda yaşamaq, işləmək, dincəlmək üçün bütün şərait vardır.

Mən, eyni zamanda, şadam ki, “Marriott” oteli memarlıq baxımından da çox gözəldir. Biz buna da daim fikir verməliyik. Çünki bizim gözəl şəhərin özünəməxsus memarlıq ənənələri vardır. Qədim şəhərimizin, burada XIX əsrdə tikilmiş binaların və müasir binaların memarlığı çox gözəldir. Əsas məsələ ondan ibarət idi ki, bu stillərin arasında olan fərqlər ümumi mənzərəni pozmasın, əksinə, ümumi mənzərəyə gözəl məqamları əlavə etsin. Mən hesab edirəm ki, biz buna nail ola bilmişik. Çünki Bakıda qədim binalar, müasir binalar bir-biri ilə harmoniya təşkil edir. Bütün işlər böyük zövqlə görülür. Əlbəttə ki, şəhərimizin hər bir guşəsində aparılan quruculuq-abadlıq işləri daim mənim diqqətimin mərkəzindədir.

Biz Bakını bağlar, parklar, bulvarlar şəhərinə çeviririk. Bakı bizim gözəl şəhərimizdir və bu gün tam məsuliyyətlə deyə bilərəm ki, dünyanın ən gözəl şəhərlərindən biridir.

Əlbəttə, belə gözəl otellərin tikintisi, beynəlxalq brendlərin, dünya şöhrətli otel şəbəkələrinin Azərbaycana gəlməsi imkanlarımızı, bizə olan inamı daha da artırır, digər sahələrə investisiyaların qoyuluşunu təşviq edir.

Sual yarana bilərdi ki, nə üçün şəhərdə bir il yarım ərzində beşulduzlu altı otel tikilir? Bu otellər necə işləyəcək? Kifayət qədər qonaq olacaq yoxsa yox? Mən əminəm ki, olacaqdır. Mən əminəm ki, bu beşulduzlu altı otel bizə kifayət etməyəcəkdir. Çünki ölkəmizin, şəhərimizin inkişafı o qədər sürətlə gedir, Bakıya gəlmək istəyənlərin sayı o qədər sürətlə artır ki, mən hesab edirəm gələcəkdə də otellərin tikintisinə böyük ehtiyac vardır.

Ancaq əlbəttə ki, şəhərimizin tarixi, gözəl yerləri vardır. Bu yerlər demək olar ki, artıq tutulub, Azadlıq meydanı, Azneft meydanı, şəhərimizin yuxarı hissəsində artıq beşulduzlu otellər tikilir. Bu otellər arasında sağlam rəqabət aparılacaqdır. İki il bundan əvvəl Bakıda bəlkə bir və ya iki beşulduzlu otel var idi, bir növ monopoliya yaradılmışdı. Ancaq indi sağlam rəqabət şəraitində hər bir brend öz imkanlarını ortaya qoyacaqdır və bir daha demək istəyirəm ki, bu, əlbəttə, bizim ümumi inkişafımıza böyük töhfədir.

Bu, məni çox sevindirir. Mən bu gün çox şadam ki, bu gözəl, müasir, möhtəşəm, böyük zövqlə tikilmiş otel fəaliyyətə başlayır. Əminəm ki, burada çalışan insanlar da hazırlıqlı, peşəkar insanlardır. Əminəm ki, siz də qonaqlara gözəl xidmət göstərəcəksiniz.

Bu gözəl hadisə münasibətilə sizi bir daha ürəkdən təbrik edirəm və sizə uğurlar arzulayıram. Sağ olun.

X X X

Sonda xatirə şəkli çəkdirildi.

SƏNƏDLƏRSərəncamlar17 noyabr 2018
16:02
“Azərbaycan Respublikası Dövlət Gömrük Komitəsi kollegiyasının tərkibinin təsdiq edilməsi haqqında” Azərbaycan Respublikası Prezidentinin 1995-ci il 1 may tarixli 170 nömrəli Sərəncamında dəyişiklik edilməsi barədə Azərbaycan Respublikası Prezidentinin Sərəncamı

Azərbaycan Respublikasının Konstitusiyasının 109-cu maddəsinin 32-ci bəndini rəhbər tutaraq, Azərbaycan Respublikası Prezidentinin 2012-ci il 4 iyun tarixl...

17 noyabr 2018, 16:02
SƏNƏDLƏRSərəncamlar17 noyabr 2018
11:05
“Vəkillər və vəkillik fəaliyyəti haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2018-ci il 1 oktyabr tarixli 1258-VQD nömrəli Qanununun tətbiqi haqqında Azərbaycan Respublikası Prezidentinin Sərəncamı

Azərbaycan Respublikası Konstitusiyasının 109-cu maddəsinin 19-cu bəndini rəhbər tutaraq, “Vəkillər və vəkillik fəaliyyəti haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikas...

17 noyabr 2018, 11:05
SƏNƏDLƏRQanunlar17 noyabr 2018
10:30
“Azərbaycan Respublikası dövlət təhlükəsizliyi və xarici kəşfiyyat orqanlarının 100 illiyi (1919-2019)” Azərbaycan Respublikasının yubiley medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının Qanunu

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 9-cu bəndini rəhbər tutaraq qərara alır:

Maddə 1. “Azərbaycan Respublikasının orden və medalla...

17 noyabr 2018, 10:30
SƏNƏDLƏRFərmanlar16 noyabr 2018
22:39
“Hərbi vəzifə və hərbi xidmət haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2018-ci il 12 oktyabr tarixli 1280-VQD nömrəli Qanununun tətbiqi və “Hərbi vəzifə və hərbi xidmət haqqında” Azərbaycan Respublikası Qanununun tətbiqi və “Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti haqqında Əsasnamə”nin təsdiqi barədə” Azərbaycan Respublikası Prezidentinin 2012-ci il 13 fevral tarixli 593 nömrəli Fərmanında dəyişiklik edilməsi haqqında Azərbaycan Respublikası Prezidentinin Fərmanı

Azərbaycan Respublikası Konstitusiyasının 109-cu maddəsinin 19-cu və 32-ci bəndlərini rəhbər tutaraq, “Hərbi vəzifə və hərbi xidmət haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2018-ci il 12 oktyabr tarixli 1280-VQD n...

16 noyabr 2018, 22:39
SƏNƏDLƏRQanunlar16 noyabr 2018
22:34
“Hərbi vəzifə və hərbi xidmət haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının Qanunu

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 18-ci bəndini rəhbər tutaraq qərara alır:

“Hərbi vəzifə və hərbi xidmət haqqında” Azərbaycan Respublikası Qanununda (Azərbaycan Respublikasının Qanunverici...

16 noyabr 2018, 22:34
SƏNƏDLƏRSərəncamlar16 noyabr 2018
22:33
“Azərbaycan Respublikası vətəndaşının şəxsiyyət vəsiqəsi haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2018-ci il 30 oktyabr tarixli 1304-VQD nömrəli Qanununun tətbiqi haqqında Azərbaycan Respublikası Prezidentinin Sərəncamı

Azərbaycan Respublikası Konstitusiyasının 109-cu maddəsinin 19-cu bəndini rəhbər tutaraq, “Azərbaycan Respublikası vətəndaşının şəxsiyyət vəsiqəsi haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2018-ci il 30 oktyabr tar...

16 noyabr 2018, 22:33
SƏNƏDLƏRQanunlar16 noyabr 2018
22:28
“Azərbaycan Respublikası vətəndaşının şəxsiyyət vəsiqəsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikasının Qanunu

Azərbaycan Respublikasının Milli Məclisi Azərbaycan Respublikası Konstitusiyasının 94-cü maddəsinin I hissəsinin 10-cu bəndini rəhbər tutaraq qərara alır:

“Azərbaycan Respublikası vətəndaşının şəxsiyyət vəsiqəsi haqqında” Azərbaycan Respublikasının Qanununda (Azərbayc...

16 noyabr 2018, 22:28