Möhtərəm cənab Prezident!

Sizin uğurlu daxili və xarici siyasətiniz sayəsində bu gün ölkəmizin daha da güclənməsi, qüdrətinin artması, beynəlxalq miqyasda nüfuzunun yüksəlməsi hər bir azərbaycanlının qəlbində böyük qürur hissi yaradır. Azərbaycanın davamlı tərəqqisi respublikanın bölgələrində, xüsusilə də işğaldan azad edilmiş Qarabağda və Şərqi Zəngəzurda həyata keçirilən möhtəşəm abadlıq və yenidənqurma işlərində də özünü göstərir. Doğma torpaqlarımızın yenidən dirçəldilməsi, dağıdılmış şəhər və kəndlərin müasir yaşayış məntəqələrinə çevrilməsi, yeni infrastruktur layihələrinin sürətlə həyata keçirilməsi hər birimizdə Azərbaycanın nə qədər güclü, qüdrətli bir ölkə olduğuna əminliyi daha da artırır. Qarabağın işğaldan azad edilməsi və yenidən qurulması həm də Sizin qətiyyətinizin, uzaqgörən siyasətinizin göstəricisidir, eyni zamanda bizim üçün qürur mənbəyidir. İnanırıq ki, Sizin rəhbərliyinizlə Qarabağımız yaxın gələcəkdə dünyanın ən müasir və inkişaf etmiş bölgələrindən birinə çevriləcək, böyük sevinclə doğma yurdlarına qayıdan bütün vətəndaşlar firavan və təhlükəsiz həyat sürəcək.

Cənab Prezident, biz gənclər Sizinlə qürur duyuruq. Fəxr edirik ki, Sizin kimi müdrik Prezidentin rəhbərlik etdiyi bir ölkənin vətəndaşlarıyıq. Sizin ətrafınızda sıx birləşmişik, yürütdüyünüz siyasəti dəstəkləyirik.

Vətən, xalq üçün gördüyünüz bu böyük işlərə, həmçinin ölkəmizdə gənclərin intellektual, fiziki və mənəvi inkişafı, onların öz potensiallarını reallaşdıra bilmələri üçün yaratdığınız əlverişli imkanlara görə Sizə minnətdarıq.

Uca Allahdan Sizə möhkəm cansağlığı, uzun ömür, dövlətimizin inkişafı, xalqımızın rifahı naminə yorulmaz fəaliyyətinizdə davamlı uğurlar arzulayıram.

Dərin hörmətlə,

Vəfadar Əfəndiyev

Azərbaycan Respublikası, Ağsu şəhəri.