Hörmətli cənab Prezident!

Mən Pakistanın Sind əyalətində Baş nazirin Gənclər Proqramının əlaqələndiricisi olaraq Azərbaycanın COP29-a uğurla ev sahibliyi etməsinə və göstərilən qonaqpərvərliyə görə Sizə dərin minnətdarlığımı bildirirəm.

Tədbirin yüksək səviyyədə təşkil edilməsi və təmin edilmiş müstəsna imkanlar Azərbaycanın qlobal iqlim dialoqunun təşviqinə sadiqliyini bir daha nümayiş etdirdi. Ən xırda detalların belə nəzərə alındığı bu konfransda olduqca önəmli müzakirələr aparıldı, əməkdaşlıq üçün əlverişli mühit təmin edildi.

Sizin səyləriniz qlobal miqyaslı maraqlı tərəflər arasında səmərəli əlaqələrin qurulmasına kömək etməklə yanaşı, həm də Azərbaycan mədəniyyətinin zənginliyini və ölkənizin beynəlxalq aləmdə liderlik qabiliyyətini nümayiş etdirdi. COP29, şübhəsiz ki, iqlim dəyişikliyi ilə mübarizənin aparılması istiqamətində birgə səylərin mühüm mərhələsi kimi yadda qalacaq, möhtəşəm ev sahibliyi və dəqiq planlaşdırma bu uğurun tərkib hissəsidir.

Bu vacib işə verdiyiniz töhfələrə görə Sizə dərin təşəkkürümü bildirirəm. Ümid edirəm ki, Azərbaycanın bu sahədəki liderliyi digər ölkələri də ruhlandırmaqda davam edəcək.

Hörmətlə,

Fahad Şafiq,

Pakistanın Baş nazirinin Gənclər Proqramı üzrə əlaqələndiricisi.

Pakistan İslam Respublikası, Sind əyaləti.