Hörmətli cənab Prezident.

Bu yaxınlarda Bakıda keçirilmiş Xaricdə Yaşayan Azərbaycanlı Alimlərin Forumuna dəstək verdiyinizə görə Sizə səmimi təşəkkürümü bildirirəm. Bu tədbir azərbaycanlı alimlərin, tədqiqatçıların qlobal şəbəkəsinin inkişafı baxımından mühüm əhəmiyyətə malikdir. Elmi icmamız daxilində möhkəm əlaqələr yaratmaqla biz Azərbaycanda mədəniyyət, elm və təhsil sahəsində inkişafı daha da sürətləndirə bilərik.

Dünyanın müxtəlif ölkələrindən olan alimlərlə əlaqə yaratmaq üçün əvəzsiz fürsətə görə forumun bütün iştirakçıları adından Sizə ürəkdən minnətdarlığımızı ifadə edirik. Bu toplantı, həm də mütəxəssislərin bilik və təcrübəsindən yararlanmaqla gənc nəslimizin inkişafına kömək etmək üçün çox vacibdir. Mən, həmçinin Azərbaycan xalqı üçün yorulmaz səylərinizi qeyd etmək istəyirəm. Sizin nümunəvi və müdrik liderliyiniz bizi Vətənimizin parlaq gələcəyinə daha ümidlə baxmağa ruhlandırır. Bu günün uğurları ilə bağlı bizə qazandırdığınız inam daha yaxşı sabah üçün işlər görməyə imkan verir.

Cənab Prezident, Azərbaycanımız naminə fəaliyyətinizdə Sizə dəstək olmaq bizim borcumuzdur və biz dünyanın harasında olmağımızdan asılı olmayaraq ölkəmizi qürurla təmsil etmək üçün səylərimizdə qətiyyətliyik.

Dərin hörmətlə,

Səidə Xəlilova,

Omanda musiqi və incəsənət üzrə fəaliyyət göstərən “Muscat Royal Conservatory”nin təsisçisi və dosenti.

Oman Sultanlığı, Muskat şəhəri.