Hörmətli cənab Prezident!

Bu gün Azərbaycanımızın sürətli tərəqqisində, ölkəmizin sosial-iqtisadi inkişafında dövlət başçısı kimi məhz Sizin imzanız dayanır. Bütün sahələrdə həyata keçirilən layihələr hər keçən gün respublikamızı uğurlu gələcəyə aparır. Sizin tərəfinizdən müəyyənləşdirilən bütün konsepsiyalar məqsədyönlü şəkildə davam etdirilir. Xüsusən də idman sahəsində gördüyünüz işlər idman ictimaiyyətini yaxından sevindirir və buna görə Sizə dərin minnətdarlığımızı bildiririk. Sizin qədim Gəncə şəhərinə hər səfəriniz zamanı edilən açılışlar, yeniliklər bizim marağımıza səbəb olur. Son səfərinizdə idmançılara və məşqçilərə hədiyyə olaraq açılışını etdiyiniz möhtəşəm Gəncə İdman Sarayı və təməlini qoyduğunuz Gəncə şəhər stadionuna görə Sizə dərin təşəkkür edirik. Şəhərimizdə nəhəng idman qurğularının yaradılması təkcə Gəncədə deyil, bütövlükdə bu bölgədə yaşayan gənclərin idmana həvəsinin artırılmasına, onların potensialının üzə çıxarılmasına və ümumilikdə idmanın kütləviliyinin təmin edilməsinə mühüm töhfə olacaq.

Cənab Prezident, bizim çalışdığımız “Kəpəz” Peşəkar Futbol Klubu ölkəmizin ən köklü, tarixi komandalarından biridir. Böyük kollektivimiz, iş bacaran, savadlı məşqçi heyətimiz var. Kollektivimiz qarşıya qoyulan məqsədə doğru - ölkəmizdə futbolun inkişafı naminə dayanmadan çalışır. Klubumuzun dövlət tərəfindən ayrılan maliyyə vəsaiti hesabına fəaliyyət göstərməsi bizi ikiqat həvəslə işləməyə, bütün tapşırıq və vəzifələri həyata keçirməyə sövq edir. Klubumuzda və onun nəzdində fəaliyyət göstərən futbol akademiyasında 70-ə yaxın şəhər sakini işlə təmin olunub. Vaxtilə “Kəpəz”də və ölkəmizin ayrı-ayrı klublarında çıxış etmiş oyunçular indi futbol veteranı kimi akademiyada məşqçi işi ilə təmin olunublar. İki mütəxəssisimizin fədakar əməyi dövlət tərəfindən yüksək qiymətləndirilib və onlar əməkdar məşqçi fəxri adını alıblar. Klubumuzda işlə təmin olunan məşqçimiz Talib Rzayev 44 günlük Vətən müharibəsində Ali Baş Komandanın rəhbərliyi altında qəhrəmanlıqlar göstərib. Sizin müvafiq sərəncamlarınız ilə o, “Füzulinin azad olunmasına görə”, "Qubadlının azad olunmasına görə”, “Şuşanın azad olunmasına görə”, "Cəsur döyüşçü” və "Vətən müharibəsi iştirakçısı” medalları ilə təltif olunub. Şuşa uğrunda gedən döyüşlərdə yaralanaraq 3-cü qrup əlillik dərəcəsi alıb. Bundan əlavə dövlət siyasətinin əsas prioriteti olaraq şəhid ailəsinin üzvləri işlə təmin olunublar.

Məşq keçmək üçün uyğun şəraitlə təmin olunmuşuq. Stadionda məşq mərkəzi və müasir, hər cür imkanlara malik akademiya binası fəaliyyət göstərir. Bütün bunlar Sizin idmana və idmançılara göstərdiyiniz diqqət və qayğının bariz nümunəsidir. Akademiyamızda 10-dan çox komandanın heyətində 250-yə yaxın futbolçu sevimli idman növü ilə məşğul olur. Biz məşqçilər onların istedadlı, bacarıqlı futbolçu kimi yetişməsi üçün əlimizdən gələni etməyə çalışırıq.

Cənab Prezident, “Kəpəz" futbol klubu və akademiyası olaraq Sizin həyata keçirdiyiniz daxili və xarici siyasəti dəstəkləyir, bu yolda birgə addımlayırıq.

Cənab Prezident, Sizə cansağlığı, ali dövləti fəaliyyətinizdə yeni-yeni uğurlar arzulayırıq.

“Kəpəz” PFK-nin kollektivi adından,

Hörmətlə,

Cabir İbrahimov

Azərbaycan Respublikası, Gəncə şəhəri.