Salyan rayonunun Vətən müharibəsi iştirakçıları adından, Bakı, Azərbaycan

Hörmətli cənab Prezident,

Sizi 2024-cü il fevralın 7-də keçirilmiş növbədənkənar prezident seçkilərində qazandığınız inamlı qələbə münasibətilə səmimi-qəlbdən təbrik edir, ölkəmizin tərəqqisi və inkişafı naminə fəaliyyətinizdə böyük uğurlar arzulayırıq.

Əsl Zəfər bayramı ovqatında keçirilən seçkilər Azərbaycan vətəndaşlarının Sizə olan hədsiz ehtiramının və inamının bariz təntənəsinə çevirdi. İlk dəfə olaraq Azərbaycanın bütün ərazisində baş tutan seçkilər bir daha göstərdi ki, ölkəmiz indi daha güclü və yenilməzdir.

Ölkəmizə, xalqımıza bəxş etdiyiniz böyük qələbə və uğurlar hər birimizin daxilində tükənməz sevinc və qürur hissləri yaradıb. Azərbaycanın güclənməsi, torpaqların azad olunması məhz Sizin əzminiz sayəsində reallaşıb.

Azərbaycanın ərazi bütövlüyünün bərpa olunması, Qarabağ bölgəsində böyük quruculuq işlərinin həyata keçirilməsi, qısa zamanda bir neçə hava limanının, yolların inşasının başa çatdırılması, şəhər və qəsəbələrin yenidən qurulması, bölgəyə Böyük Qayıdış Proqramının həyata keçirilməsi gördüyünüz işlərin nəticəsidir.

Cənab Prezident, Müzəffər Ali Baş Komandan qələbə münasibətilə Sizi bir daha Salyan rayonu Vətən müharibəsi iştirakçıları və əlilləri adından təbrik edir, uzun ömür, möhkəm cansağlığı və müstəqil dövlətimizin daha da inkişafı naminə fəaliyyətinizdə yeni-yeni uğurlar arzulayırıq. Salyanlılar həmişə Sizinlədir!

Böyük hörmət və ehtiramla,

Salyan rayonunun Vətən müharibəsi iştirakçıları adından:

Kərimov Rəşad Malik oğlu,

Quliyev Heydər Seymur oğlu,

Rüstəmov Ülvi Səbahəddin oğlu,

Əliyev Abdulla Rafael oğlu,

Abdullayev Faiq Savaddin oğlu və başqaları (kollektiv – 41 nəfər).

Azərbaycan Respublikası, Bakı şəhəri.