İlham Əliyev Horadizdə Heydər Əliyev Mərkəzinin açılışında iştirak etmişdir

Prezident İlham Əliyev Horadizdə Heydər Əliyev Mərkəzinin açılışında iştirak etmişdir.

Dövlətim başçısı mərkəzin rəmzi açılışını bildirən lenti kəsdi.

Məlumat verildi ki, mərkəzin 1600 kvadratmetr sahəsi olan binasının inşasında milli memarlıq elementlərindən geniş istifadə edilmişdir. Binanın təməli 2011-ci ilin iyununda qoyulmuş, inşaat işləri cari ilin oktyabrında başa çatdırılmışdır.

Mərkəzdə ümummilli lider Heydər Əliyevin büstü qoyulmuş, ulu öndərin həyat və fəaliyyətinin bütün dövrlərini, o cümlədən müxtəlif illərdə Füzuli rayonuna səfərlərini əks etdirən fotoguşələr yaradılmışdır. Burada ulu öndərin zəngin dövlətçilik irsinin gələcək nəsillərə çatdırılması üçün elektron kitabxana, ümummilli liderə aid sənədlərin saxlandığı xüsusi guşə də vardır.

Prezident İlham Əliyev mərkəzin konfrans zallarına baxdı.

Bildirildi ki, xüsusi dizaynla yaradılan 80 və 300 nəfərlik konfrans zalları rayon və respublika səviyyəli tədbirlərin keçirilməsi üçün nəzərdə tutulub. Mərkəzdəki xidməti otaqlar kompyuterlər və digər ən müasir avadanlıqla təchiz olunmuşdur. Mərkəzdə məktəblilərin Azərbaycanın zəngin tarixini dərindən öyrənmələri üçün xüsusi dərnəklər də fəaliyyət göstərəcəkdir. Qədim Azərbaycan dövlətləri haqqında məlumatlar və onların rəmzlərinin lazer görüntülərinin nümayiş olunduğu mərkəzdə müasir formatlı kinozal, sərgi salonu, foto, dizayn və səs studiyaları da vardır. Buradakı kurslarda gənclər müasir texnoloji yeniliklərlə yaxından tanış olacaq, bilik və bacarıqlarını inkişaf etdirəcəklər. Bunun üçün internet sinfi və kompyuter mərkəzi qurulmuşdur. Mərkəzdəki monitor zallarında ulu öndər Heydər Əliyevin siyasi irsindən və Prezident İlham Əliyevin fəaliyyətindən bəhs edən məşğələlər təşkil ediləcəkdir. Binada müasir havalandırma sistemi quraşdırılmışdır.

Prezident İlham Əliyev mərkəzdə görülən işləri yüksək qiymətləndirdi.